2 Samuel 17
1 亞希多弗對押沙龍講：「請准𠊎選一萬兩千人；今暗晡𠊎就去追大衛。
2 𠊎愛在佢當灰心當𤸁个時攻擊佢；佢一定會驚到無葛煞，跈佢个人也全部會逃走。𠊎會單淨㓾王，
3 將佢个軍隊帶來歸你，就像新娘轉到老公个身邊恁樣。你單淨㓾一儕，其他个人全部會平安無事。」
4 押沙龍㧯以色列該兜長老全部認為這係當好个主意。
5 押沙龍講：「去喊亞基人戶篩來，𠊎等也愛聽佢个意見。」
6 戶篩來到，押沙龍對佢講：「亞希多弗㧯𠊎等出恁樣个主意，𠊎等照佢个提議去做好麼？若係你毋同意，你有麼介建議？」
7 戶篩應講：「亞希多弗這擺个主意毋好。
8 你知若爸大衛㧯佢个部下全部係當會相㓾个人；佢等這下像被人搶走細熊个熊乸恁惡。若爸係一個經驗豐富个戰士，暗晡時一定無㧯軍隊共下住。
9 驚怕這下佢囥在山窿肚，抑係別个所在。佢一出手攻打你个軍隊，聽到个人一定會恅到你个部下打輸了。
10 該時，就係勇壯像獅仔个人也會嚇到半生死；因為在以色列當中，麼人都知若爸係大英雄，佢个部下也全部係當會相㓾个人。
11 所以，𠊎建議你召集所有以色列人共下，對最北片个但到最南片个別是巴，像海滣个沙仔恁多，你親自帶領佢等上戰場。
12 無論大衛在㖠位，𠊎等定著會尋到佢，然後，在佢無注意个時，𠊎等會臨到佢像露水落在地上一樣；恁樣，佢㧯佢个部下一個也走毋掉。
13 若係佢退到城肚去，𠊎等這片个以色列人就會帶索仔去將該城拉下山壢！連一粒細石仔也毋俾它留在山頂。」
14 押沙龍㧯所有以色列人全部講：「亞基人戶篩个建議比亞希多弗个較好。」上主決定毋俾亞希多弗个好主意受採納，為到愛降災禍在押沙龍身上。
15 戶篩將佢向押沙龍並以色列該兜長老所提个建議㧯祭司撒督並亞比亞他講，同時也㧯佢等講亞希多弗个建議。
16 戶篩又講：「趕緊派人去㧯大衛講，今暗晡毋好在曠野个渡船頭過夜，愛黏時過約旦河；恁樣，王㧯部下正毋會被人消滅。」
17 該時，亞比亞他个孻仔約拿單㧯撒督个孻仔亞希瑪斯在耶路撒冷外圍个隱‧羅結泉水滣頭等等，因為佢等毋敢入城，驚怕被人發現。有一個使女常常來㧯佢等講所發生个事，佢等就轉去㧯大衛王講。
18 總係有一日，一個細阿哥仔看到佢等，就去㧯押沙龍講。兩儕趕緊走去囥在巴戶琳某人个屋下。該人个禾埕有一口井，佢等就落井肚去。
19 該人个𡜵娘用井蓋將井口揜好，又在頂高委兜麥仔，免得被人注意到。
20 押沙龍个官員到這人屋下來，問該婦人家講：「亞希瑪斯㧯約拿單在㖠位？」婦人家應講：「佢等過河去了。」該兜人尋來尋去尋毋到佢等，就轉耶路撒冷去了。
21 該兜人離開以後，亞希瑪斯㧯約拿單對井肚上來，去向大衛王報告亞希多弗計謀追殺王个事，又講：「遽遽過河去！」
22 所以大衛㧯跈佢个人全部開始過約旦河去。到天光个時，佢等全部過去了。
23 亞希多弗看自家个建議無被人採納，就騎驢仔轉家鄉去。佢將自家个後事交帶清楚，就吊頸自殺。有人將佢埋在厥家族个墳墓。
24 押沙龍㧯佢个軍隊過約旦河个時，大衛已經到瑪哈念。
25 (押沙龍已經派亞瑪撒做元帥，代約押。亞瑪撒係以實瑪利人益帖个孻仔。厥姆愛比該係拿轄个妹仔，㧯約押个阿姆洗璐雅係姊妹。)
26 押沙龍㧯以色列人在基列安營。
27 大衛到瑪哈念个時，有三個人出來迎接佢。佢等係亞捫族个拉巴人拿轄个孻仔朔比，羅‧底巴人亞米利个孻仔瑪吉，㧯基列个羅基琳人巴西萊。
28 佢等帶等鑊頭、碗、被、食物給大衛㧯跈佢个人。食个東西有小麥、大麥、麥片、焙熟个麥串、四季豆、碗豆、
29 蜂糖、乳餅、乳油㧯綿羊。佢等講，大衛㧯跈佢个人在曠野一定又𤸁又饑渴。